ಒಕ್ಕಲಿಗರ ನಿಜ ಗುರು ಶ್ರೀಶ್ರೀಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿ - ಒಂದು ಚೈತನ್ಯದ ಹರಿವು

ಪರಿಚಯ

ಪರಮಪೂಜ್ಯ ಜಗದ್ಗುರು ಭೈರವೈಕ್ಯ ಮನುಕುಲ ತಿಲಕ ಒಕ್ಕಲಿಗರ ನಿಜ ಗುರು ಶ್ರೀಶ್ರೀಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿ ಅವರ ಹೆಸರು ಒಕ್ಕಲಿಗ ಸಮುದಾಯದ ಚೈತನ್ಯದ ಪ್ರತೀಕ. ಅವರ ಜೀವನಶೈಲಿ, ಸಮಾಜಮುಖಿ ಕಾರ್ಯಗಳು, ಮತ್ತು ಪರಿಪೂರ್ಣ ಜ್ಞಾನದಿಂದ ಬಡವ-ಬಲ್ಲಿದರ ನಡುವಿನ ತಾರತಮ್ಯವನ್ನು ಅಳಿಸಿ, ಸಮಾನತೆಯ ದಿವ್ಯಜ್ಯೋತಿಯನ್ನು ಬೆಳಗಿದರು. ಒಕ್ಕಲಿಗರು ಕೇವಲ ಒಕ್ಕಲುತನದ ಕರ್ಮಯೋಗಿಗಳು ಮಾತ್ರವಲ್ಲ, ಜ್ಞಾನ ಮತ್ತು ಕೀರ್ತಿಯನ್ನೂ ಹೊಂದಿದ್ದಾರೆ ಎಂಬುದನ್ನು ಜಗತ್ತಿಗೆ ಸಾರಿದವರು ನಮ್ಮ ಪೂಜ್ಯ ಶ್ರೀಗಳು.

ಗುರು ಪರಂಪರೆಯ ನಿರಂತರ ಹರಿವು

ಭಗವಂತನು ತನ್ನ ಭಕ್ತರನ್ನು ಹೇಗೆ ವಿವಿಧ ರೂಪಗಳಲ್ಲಿ ಕಾಯುತ್ತಾನೋ, ಅದೇ ರೀತಿ ಪೂಜ್ಯ ಬಾಲಗಂಗಾಧರನಾಥ ಸ್ವಾಮೀಜಿ ಅವರ ಉಪಸ್ಥಿತಿ ನಮ್ಮ ಒಕ್ಕಲಿಗ ಸಮುದಾಯದಲ್ಲಿ ನಿರಂತರವಾಗಿ ಹರಿಯುತ್ತಿದೆ. ಅವರ ಸರಳತೆ ಮತ್ತು ಶ್ರೇಷ್ಠತೆಯ ಪರಂಪರೆಯನ್ನು ಇಂದಿನ ಗುರುಗಳಾದ ನಿರ್ಮಲಾನಂದನಾಥ ಮಹಾಸ್ವಾಮೀಜಿ, ನಂಜಾವಧೂತ ಮಹಾ ಸ್ವಾಮೀಜಿ, ಶ್ರೀ ಸಿದ್ದರಾಮ ಚೈತನ್ಯ ಮಹಾಸ್ವಾಮೀಜಿ, ಭೈರವೈಕ್ಯ ಚಂದ್ರಶೇಖರನಾಥ ಸ್ವಾಮೀಜಿ, ಸೌಮ್ಯನಾದ ಸ್ವಾಮೀಜಿ, ಪ್ರಸನ್ನನಾಥ ಸ್ವಾಮೀಜಿ, ಮತ್ತು ಮಂಗಳನಾಥ ಸ್ವಾಮೀಜಿ ರವರ ಕರ್ಮದಲ್ಲಿ ಕಾಣಬಹುದು. ಅವರ ಉಪಸ್ಥಿತಿಯು ಎಲ್ಲರಲ್ಲೂ ಒಂದೇ ರೀತಿಯಾಗಿ ಪ್ರವಹಿಸುತ್ತಲೇ ಇರುತ್ತದೆ. ಆದ್ದರಿಂದ, ಯಾವ ಸ್ವಾಮೀಜಿಯವರ ಭಾವಚಿತ್ರ ಚಿಕ್ಕದಿದೆ ಅಥವಾ ದೊಡ್ಡದಿದೆ ಎಂದು ವಾದಿಸುವುದು ಅಪ್ರಸ್ತುತ. ಎಲ್ಲ ಗುರುಗಳಲ್ಲೂ ನಮ್ಮ ಶ್ರೀಮಠದ ಚೈತನ್ಯವೇ ಇರುವುದರಿಂದ, ಭೈರವೈಕ್ಯ ಜಗದ್ಗುರು ಶ್ರೀ ಶ್ರೀ ಶ್ರೀ ಬಾಲಗಂಗಾಧರನಾಥ ಮಹಾಸ್ವಾಮೀಜಿ ಅವರ ಭಾವಚಿತ್ರಕ್ಕೆ ಹೆಚ್ಚು ಪ್ರಾಮುಖ್ಯತೆ ನೀಡುವುದು ನಮ್ಮ ಆರಾಧ್ಯ ಗುರುಗಳಿಗೆ ಸಲ್ಲಿಸುವ ಗೌರವ.

ರಾಜಕೀಯ ಲಾಭಕ್ಕಾಗಿ ಸಮುದಾಯದ ದುರ್ಬಳಕೆ

ಇತ್ತೀಚೆಗೆ ವಿಜಯನಗರದ ಶಾಖಾ ಮಠದ ವ್ಯಾಪ್ತಿಯಲ್ಲಿ ನಡೆದ ಜಾತಿ ಗಣತಿ ಕಾರ್ಯಗಾರದಲ್ಲಿ ಕೆಲವು ರಾಜಕೀಯ ಉದ್ದೇಶಗಳಿಗಾಗಿ ನಮ್ಮ ಶಿಷ್ಯರನ್ನು ಪ್ರಚೋದಿಸಲಾಗುತ್ತಿದೆ. ಕೆಲವು ವ್ಯಕ್ತಿಗಳು ವೈಯಕ್ತಿಕ ಲಾಭಕ್ಕಾಗಿ ಸ್ವಾಮೀಜಿಗಳನ್ನು ಭಾವಚಿತ್ರಗಳಿಗೆ ಸೀಮಿತಗೊಳಿಸಿ, ಯಾವ ಸ್ವಾಮೀಜಿ ಚಿತ್ರ ದೊಡ್ಡದಾಗಿರಬೇಕು, ಯಾರದ್ದು ಚಿಕ್ಕದಾಗಿರಬೇಕು ಎಂದು ಮಾತನಾಡುತ್ತಿರುವುದು ವಿಷಾದನೀಯ. ಇದು ಮಠದ ಪಾವಿತ್ರ್ಯವನ್ನು ಹಾಳು ಮಾಡುವ ಯೋಚನೆಯಾಗಿದೆ. ದೇವಾಲಯದಲ್ಲಿ ದೇವರನ್ನು ಆರಾಧಿಸುವ ಭಕ್ತರಿಗೆ ದೇವರು ಒಬ್ಬನೇ. ಅದೇ ರೀತಿ ಮಠದಲ್ಲಿ ಎಲ್ಲಾ ಗುರುಗಳೂ ನಮ್ಮ ಚೈತನ್ಯದ ಭಾಗ.

ವ್ಯಕ್ತಿ ನಿಷ್ಠೆ ಬೇಡ, ಕರ್ಮ ನಿಷ್ಠೆಯೇ ಮುಖ್ಯ

ಇಂದು ನಮ್ಮ ಸಮುದಾಯದಲ್ಲಿರುವ ಅನೇಕರು ತಮ್ಮ ಯೋಚನಾಶೀಲತೆಯನ್ನು ಬದಲಾಯಿಸಿಕೊಳ್ಳಬೇಕಾಗಿದೆ. ವ್ಯಕ್ತಿ ನಿಷ್ಠೆ ಸಮುದಾಯಕ್ಕೆ ಹಾನಿಕಾರಕ. ಸಮುದಾಯದ ಒಳಿತಿಗಾಗಿ ಕರ್ಮ ನಿಷ್ಠೆ ಮತ್ತು ಧರ್ಮ ನಿಷ್ಠೆ ಮುಖ್ಯ. ಧರ್ಮ ನಿಷ್ಠೆಯಲ್ಲಿ ಕೆಂಪೇಗೌಡರು ಶ್ರೇಷ್ಠರಾದರೆ, ಕರ್ಮ ನಿಷ್ಠೆಯಲ್ಲಿ ಪೂಜ್ಯ ಬಾಲಗಂಗಾಧರನಾಥ ಸ್ವಾಮೀಜಿ ಅವರು ಶ್ರೇಷ್ಠರು. ಈ ಇಬ್ಬರು ಮಹನೀಯರ ಆದರ್ಶಗಳು ನಮ್ಮ ಸಮುದಾಯಕ್ಕೆ ಮಾದರಿಯಾಗಬೇಕು. ಜಾತಿ ಗಣತಿ ಮತ್ತು ಇತರ ವಿಚಾರಗಳನ್ನು ಹಿಡಿದು, ಸಮುದಾಯದ ಹೆಸರಿನಲ್ಲಿ ರಾಜಕೀಯ ಲಾಭ ಪಡೆಯುವ ಬದಲು, ನಾವು ನಿಜವಾದ ಸಮಸ್ಯೆಗಳಾದ ರೈತರ ಭೂಮಿ ಪ್ರಕರಣಗಳು, ತಪ್ಪು ಕೇಸುಗಳು ಮತ್ತು ಸರ್ಕಾರಿ ನೆರವುಗಳ ಬಗ್ಗೆ ಹೋರಾಡಬೇಕು.

ಸ್ವಾಭಿಮಾನವೇ ನಮ್ಮ ಶ್ರೇಷ್ಠತೆ

ಮೀಸಲಾತಿಗಾಗಿ ಭಿಕ್ಷೆ ಬೇಡುವುದರ ಬದಲು, ನಾವು ನಮ್ಮ ಸ್ವಾಭಿಮಾನವನ್ನು ಎತ್ತಿ ಹಿಡಿಯಬೇಕು. ಒಕ್ಕಲಿಗರು ಎಂದರೆ ರೈತರು. ನಮ್ಮ ಗೌರವ ಮತ್ತು ಸ್ಥಾನಮಾನಗಳನ್ನು ಉಳಿಸಿಕೊಳ್ಳಲು ನಾವು ರಾಜಕೀಯ ವ್ಯವಸ್ಥೆಯನ್ನು ಸೃಷ್ಟಿಸಬೇಕು, ಅದು ನಮ್ಮನ್ನು ಪ್ರತಿನಿಧಿಸಬೇಕು. ಒಕ್ಕಲುತನವನ್ನು ನಮ್ಮ ಆದರ್ಶ ಎಂದು ಪ್ರಪಂಚಕ್ಕೆ ತೋರಿಸಬೇಕು. ಗ್ರಾಮೀಣ ಪ್ರದೇಶದಲ್ಲಿರುವ ಒಕ್ಕಲಿಗರಲ್ಲಿ ಇಂದಿಗೂ ಅವರ ಸಂಪ್ರದಾಯ ಮತ್ತು ಕೃಷಿಯ ಬಗೆಗಿನ ಸ್ವಾಭಿಮಾನ ಹೆಚ್ಚಿದೆ.

ಒಗ್ಗಟ್ಟಿನಿಂದ ನಮ್ಮ ಹಕ್ಕುಗಳನ್ನು ಪಡೆಯಲು ನಾವು ಸಂಘಟಿತರಾಗಬೇಕು. ಕೃಷಿಗೆ ಹೆಚ್ಚು ನೆರವು ನೀಡಬೇಕು, ರೈತರ ಕಷ್ಟಗಳಿಗೆ ಸ್ಪಂದಿಸಬೇಕು. ಸರ್ಕಾರಿ ಭೂಮಿಗಳನ್ನು ಕೃಷಿಯಲ್ಲಿ ತೊಡಗಿರುವವರಿಗೆ ನೀಡಬೇಕು, ವ್ಯಾಪಾರೀಕರಣ ಮಾಡುತ್ತಿರುವವರಿಗೆ ಅಲ್ಲ. ಇದು ನಮ್ಮ ರಾಜಕೀಯ ಶಕ್ತಿಯನ್ನು ತೋರಿಸುತ್ತದೆ. ನಮ್ಮ ಸಮುದಾಯದ ನಾಯಕರು ತಮ್ಮ ವೈಯಕ್ತಿಕ ಲಾಭಕ್ಕಾಗಿ ಮೌಲ್ಯಗಳನ್ನು ಮರೆಯುತ್ತಿರುವುದು ದುರಂತ. ನಮ್ಮ ಭವಿಷ್ಯ ನಮ್ಮ ಇಂದಿನ ನಿರ್ಧಾರಗಳಲ್ಲಿರುತ್ತದೆ ಎಂಬುದನ್ನು ನಾವು ಅರಿಯಬೇಕು.

ಜೈ ಶ್ರೀ ಗುರುದೇವ.